ALYNA BIE REINA

Eima nô kyh maniah pachâ ngaitapa, Freddie nô (Rev. Violet Louise Annie Mark ‘L’) chiehlei pasana â vawla thaohno tawhta achhâna noh khôlâ taihta Awnano nôpawpazy, MADC nôpawpazy, Veiseihpa Py to nata mopakha veiseihpa zydua hleikhô ta Thohna chakaona rai hriatuhpa Dawhty, Nurse nata ama hrialâhpa zydua, Krista liata eimâ ngiapâ lâhpa zydua ta maniah taokhei ei chi ta, eima peimawhpa nata angiahpa to rai liata maniah nama baokhâna nata deichhyna zydua vâta eima Khazohpa moh ta pathipalôhru hmeiseihpa ta alyna bie eima cha reih.

Eima chiehleino nata thohna su eima pangaina, sievawna nata niebaw zydua chhao phahla leipa nata nôpo leipa ta maniah pa y sa lymâ ei chi ta, chahleikhô ta O lâ nata Thohna su liata maniah mohôhtuhpazy, Sôh nata thih ta maniah baotuhpazy, Mara râh liata pahrâhpazy dei châ leipa ta eima râh (Mara râh) khôtho lâta a y pa zydua hleikhô ta nochhi lâta Marasawzy nata Râh hro (Foreign) lâta Marasaw a ypa zydua nama chô liata athiehpa ta alyna bie chahlâ chanei ei na ta, he alyna bie Châ eima ropa he aki khai thei hra’vei sala, rie maniah namâ pypa chyu awpa ta eima Khazohpa moh ta ei châ haw ei.

Eima nôhrâhpa maniah a vawpahâsaina kyh liata JAC Saikao nata khihsawzy, khih hro lâ tawhta maniah vaw baotuhpa nata deichhytuhpazy, ri vaw kiahtuhpa zydua palôh hmeiseihpa ta alynabie eima chahlâ chanei. 

MADC sawhkhâ, Awnanopa - ECM, CCI (M), MEC nata NGO zydua, aviapachaipa ta ri kiapazy nie awpa vaw thyutuhpa zydua nata chôtlatuhpa zydua hleikhô ta MTP Sub. Headquarters’ – Saikao, Tipa nata Zyhno zy, su hrolâ tawhta maniah taokheituhpa nata baotuhpa zydua eimâ châ ly hmeiseih.

Sôh nata thih, tha nata zâh hleikhô ta, thlahchhâna nata kao nano nanopa liata maniah baotuhpa nata deichhytuhpa zydua cha eima phana rakha ta vaw ngia (Record) tyh hrapi ta, eima ngia leipa hluhpi chhao a y thei hra aw. Eima Record chhôhpa zydua chhao he ahluh kawpa vâta he alyna bie reina Châ liata vaw palâsa khai thei awpa châ leipa ta, nama pachâthaina eimâ châ hawh hmeiseih. Eima rona Châbu nata pathipalôh lia deikua a sia kawpa ta y ngathlâh ha ta, eima thlâhlôh ngaita tyh. Cha zydua vâta eima Khazohpa moh ta alyna bie eima vaw reih chanei.

He nama hmopha taopa zydua he eima chhôhkha heta alyna bie rei tiah lei awpa cha hnei pi ta, cha thô thei rimâ awpa chhao châ hra ma pi; Chôkhazohpa ta maniah pahnokhei sala, alie hluhpi ta byhnâ cha pie mawh ei sy! Eimâ châ ly ngaita.

Sd/-
Rev. L. Mark & FamilyL
LorrainVille, Saikao, Maraland
Siaha District, Mizoram (India).